2013 թվականը սկսեցի ավելի վստահ քայլերով` արդեն հինգերորդ ամիսն էր ինչ աշխատում էի կրթահամալիրում և հիմա փորձում եմ հիշել ու ամփոփել անցած մեկ տարին , հիշողություններս ու ձեռքբերումներս շատ են , կարևոր են բոլորը, քանզի ձեռքբերում են , բայց փորձեմ առանձնացնել.
Առաջին հերթին զգում եմ, որ մեծացել եմ, մեծացել եմ ոչ միայն , որ արդեն 23 տարեկան եմ , այլ մեծացել եմ բառիս ամենալայն իմաստով: Կրթահամալիրում հնարավորություն ունես մեծանալու, աճելու, առաջ ընթանալու գիտելիքներով , փորձով, կարևորում եմ այս փաստը, քանզի յուրաքանչյուրիս համար էական է անընդհատ սովորել, ստեղծագործել, հետազոտել, բացահայտել: Կրթահամալիրում մեծանում ես յուրաքանչյուր տարի, յուրաքանչյուր ամիս, ամեն օր :
Երբ սկսեցի վարել մաթեմատիկայի ընտրությամբ գործունեության դասընթացը, մտահոգվում էի, անհանգստանում ինչպիսին են լինելու արդյունքները , այսօր համեմատում եմ , վերագնահատում, պատմում եմ ընկերներիս, ուրախ եմ, թե ինչպիսի սովորողներ ունեմ, թե ինչպիսի սովորողներ ունենք , հանգիստ եմ, որովհետև նրանք դուրս են << ստանդարտ >> կոչվածից: Հրճվանքով եմ հեռանում, երբ տեսնում եմ, թե ինչպես են <<վիճում>> , երբ յուրաքանչյուրն առաջարկում է խնդրի լուծման իր տարբերակը և հիմնավորում, երբ միանգամից չեն համաձայնվում դասընկերոջ առաջարկած լուծման եղանակին, հարցեր են ուղղում, քննարկում , խնդիրներ են առաջարկում : Հիշում եմ, թե ինչպես են փայլում նրանց աչքերը , երբ զգում են հայտնաբերման հրճվանքը, ուզում են բղավել, որ իրենք գտել են լուծումը, հետո հիշում են , որ չպիտի բղավեն և անհանգստությամբ ու ժպիտով բարձրացնում ձեռքը: Իմ ամենաարժեքավոր ձեռքբերումը, որ ես ունեմ այսօր:
2013-ին ինձ վստահվեց << Կենգուրու>> մաթեմատիկական մրցույթի կազմակերպումը կրթահամալիրում, կարևոր էր ինձ համար, կարևորում եմ հատկապես մաթեմատիկայի խմբի սովորողների մասնակցությունը , կարծում եմ արդյունքները ևս ուրախալի էին, գոնե ինձ համար:
2013-ին սկսել ենք մի քանի նախագծեր 5-6-րդ դասարանի սովորողների հետ , որոնք այս տարի ավարտին կհասցնենք, թե ինչպիսին պետք է լինեն դրանք` ահա իմ պատկերացումները. https://zpapoyan.wordpress.com/2013/09/23/%D5%A1%D5%B4%D5%A5%D5%B6%D5%A1%D5%A5%D6%80%D5%AF%D5%A1%D6%80-%D5%B3%D5%A1%D5%B6%D5%A1%D5%BA%D5%A1%D6%80%D5%B0%D5%A8-%D5%BD%D5%AF%D5%BD%D5%BE%D5%B8%D6%82%D5%B4-%D5%A7-%D5%A1%D5%BC%D5%A1%D5%BB%D5%AB/
Տարին հագեցած էր նաև ճամփորդություններով , յուրաքանչյուր ճամփորդությունից մեծագույն էներգիա և անմոռանալի տպավորություններ ես քեզ հետ տանում:
Անելիքները շատ են , պետք է պարզապես սիրով և նվիրվածությամբ աշխատել : Շատ ծրագրեր, նախագծեր և մտքեր ունեմ, կխոսեմ դրանց մասին հաջորդ տարի , երբ իրականացրած կլինեմ:
Որպես խնդրանք նշեմ այն մասին, ինչի շուրջ ես մտածում եմ ամեն օր . մենք պետք է պատասխանատու լինենք յուրաքանչյուր սովորողի համար, նրանք մեզ են վստահված, և եթե կա թեկուզ մեկ սովորող, ում չի հետաքրքրում մեր դասը, դա պետք է մեզնից յուրաքանչյուրին մտածելու տեղիք տա:
Շնորհակալություն